作為一個「專業」病人，我並非浪得虛名的！我自細就與藥物為伍，五、六歲左右我已經練得一身好武功──閒閒地可以同時鯨吞10粒8粒藥丸！不過，呢個靚妹還是有死穴的...... 就係藥水！每次食親藥水我都會嘔，所以細細個睇親醫生，我臨走前都會同醫生講：「可唔可以唔要藥水呀？」遇上沒有藥丸可替代的，我娘就會出動痰盂，因為我一定即嘔，萬試萬靈！
2000年換骨髓後，體質更是每況愈下。基本上呢十幾廿年，我個個月身體都會有狀況出現。我成日戲言：「努力工作是為了有錢睇醫生」。錢是其次，成日一堆堆抗生素、消炎藥、止痛藥倒落個胃，d菌未死我已經被打殘；兼且用藥過度，身體亦開始產生抗藥反應，愈食劑量愈高。
我呢個藥物堆填「軀」，已經被打到得返個瞉。漸漸，狀況開始愈來愈多，愈來愈嚴重，甚至經常出現「醫得頭來腳反筋」的現象。
我覺得自己好討厭！點解病魔死都唔肯放過我？仲要係鑊鑊新鮮鑊鑊金！
冷靜落黎，我開始意識到，病魔揀我，係因為我自身的保護能力接近零。免疫力、抵抗力都無，點會唔係最好蝦果個呢？
好彩，我娘賜我硬頸唔服輸的性格；知道問題癥結後，我開始周圍搵幫自己軍隊加強實力的方法。還好我愛冒險（反正條命都係執返黎），多年來除左符水我未飲過外，乜鬼我都試一餐。
就係咁，我踏上左精油之路……
沒有留言:
張貼留言